高深莫測的床破

飛毛腿

中美貿易戰十日後進入第二階段升級戰
8月 23日， 老味對額外價值 160億美籠中國商品加徵 25% 關稅
同日生效，老中將對老味同等價值商品加 25% 關稅，以牙還牙

今年初3月份，床破話要發起貿易戰
佢信心滿滿咁話 ： Trade wars are good， and easy to win
到目前爲止，佢呢句話有一個成功嘅例子 ～ 泡菜國
短短幾日，泡菜國即刻跪低，俾老味更改美韓自由貿易協議，加入不平等條約
但除咗泡菜佬，老味再冇其他貿易戰成功案例

明眼嘅地球人都睇得出
老味打呢場貿易戰最大嘅對手，亦係最難啃嘅對手就係老中
無論老中嘅古老兵法也好，西方嘅戰略也好
正常嘅策略就係盡量搵多 D 幫手結盟去圍剿對手
所謂一個籬笆三根樁，一個好漢三個幫
但腦筋清奇又自信心爆棚嘅床破，竟然單挑全地球

飛毛腿

老味一個進口鋁鋼加徵關稅
就將本來係盟友嘅歐盟丶大家拿丶墨西哥丶日本等打成貿易戰敵人
本來嘛，中美大打出手， 呢班友企定定袖手傍觀，鷸蚌相爭，睇下有冇機會抽水咬老中兩啖
點知床破大棍一揮，連佢哋都打埋
床破殺得性起
最近連一堆窮國小國度唔肯放過

話說，老味一個所謂 GSP （ Generalised Scheme of Preferences ）優惠制度
呢個優惠係給予一 D 發展中國家，幾千種商品進口老味度可以獲免稅或者減稅
亞太地區有 25個國家，好似印度丶印尼丶泰國之類
其他東歐丶中東丶非洲都有 D 窮國可以受惠
床破咬老中咬唔到咩肉，可能有 D 發窮惡
諗諗下，蚊脾肉都係肉，好過冇
於是動腦筋要向呢班窮鬼埋手

飛毛腿

最近睇到屈潁妍形容菜菜子係一位"不知所措"的女人.....

我見到既床破係一個財大氣粗巴x閉閉既老臭八婆，一 ...
神..六 發表於 2018-8-14 11:58 PM

菜菜子家下不知幾 high
佢做緊春夢，認為自己可以利用床破同老中格劍嘅機會，做一件千古留名嘅大事
菜菜子覺得自己係鴻圖大略，運籌帷幄
～ 老娘將床破當棋子擺弄  




至於床破，唔係話佢有幾高深
而係佢出招鬼神莫測，超出正常人嘅理解能力

飛毛腿

老味嘅 GSP 貿易優惠政策係 1976年創立
當年老味啱啱由越南灰頭土臉執包袱走人
燒銀紙打一個武器裝備唔入流嘅北越，打極都打唔死
～ 鬼咩，北越背後係老中同蘇聯支持
老中一早警告，老味地面部隊唔可以越過 17度線，否則後果自負
今次老味好聽話，唔敢越過界線，只有縮晌南越邊界打越共
只能派轟炸機去狂轟河內，用生化武器去炸九越共 （ 落葉劑）
但咁打法唔可以打殘越共
老味自己就打到債臺高築，死咗幾萬老味大兵
國內反戰熱潮風起雲湧
終於尼克遜去大陸同老毛講掂數， 老味逐步撤軍
老味前腳一走，越共後腳就攻陷南越

老味丟晒架，晌班馬仔面前鞋口鞋面
果時蘇聯意氣風發，老味就頭耷耷
為咗維護自由世界老大嘅形象
就拍心口推個 GSP 政策出嚟 ，嗱，老大我照顧班窮馬仔
開放個市場俾你哋搵啖食，幾千種商品減免你哋班窮鬼進口關稅
～ 冷戰年代，西方世界打嘅旗號係自由世界，而共產國家嘅旗號係民主社會
～ 蘇聯歸西之後，老味就執起蘇聯枝民主大旗，開口埋口民主

飛毛腿

老味呢個 GSP 政策涉及嘅貿易額好有限
班窮鬼國家一年都只係約 200億美籠貿易額受惠於呢個政策 （下面嘅數字都係以美籠計算）
好似印度只有 56億，泰國有 46億，印尼就有20億，土耳其有 16.6億
相對同老中丶歐盟等日韓嘅貿易額，真係微不足道
但老床對班窮鬼越睇越唔順眼，仲話佢哋揩老味油，好似當老味係錢甖咁撩喎

Tariffs are the greatest ! Either a country which has treated the United States unfairly on Trade negotiates a fair deal, or it gets hit with Tariffs. It’s as simple as that - and everybody’s talking! Remember, we are the “piggy bank” that’s being robbed. All will be Great!

所以老床開出條件俾班窮鬼 ：
一係你哋乖乖地同我傾一個公平嘅貿易協議
一係俾我打你哋關稅，打到你抽筋

點先令你老床滿意地認為係公平嘅貿易協議 ？
比如泰國，你乖乖地放我哋有激素藥物 （ 瘦肉精）嘅豬肉入口
～ 泰國禁止含有瘦肉精嘅豬肉入口
比如印度，印度對老味嘅乳製品等醫療器械徵收關稅
精你就減免關稅，唔係就泡製你

飛毛腿

佢策略係開天殺價落地還錢。佢要幫國內解決逆差。所以四圍掠水。老中唔服，但老美冇得揀，老美退，其他國嘅 ...
無神論狂徒 發表於 2018-8-16 08:32 AM

呢個就老床著書立說，得意得意洋洋嘅 The art of the deal
向談判對手施以巨大壓力，令對手信心瀕臨崩潰
於是對手討價還價嘅能力大大減弱，心諗輸少當贏
但我認為前提係雙方強弱懸殊先有呢個效果
如果處境對調，老床處於弱勢，佢開個毛天價去壓逼對手

因為老味對絕大部份貿易對手都係逆差
老床覺得全世界人都賺老味錢，靠老味開飯
所以佢係處如強勢，對手處於弱勢
老床同佢班智囊對老中嘅判斷大概係咁 ：
中美貿易額每年老中向老味輸出總值五千幾億美籠嘅商品
而老味只向老中輸出二千幾億美籠嘅商品
出口貿易佔老中經濟好大比例
老床覺得呢個係老中嘅死穴，老床曬佢冷，老中應該跟唔起
可能老床原先嘅估計，老中係咁做下樣撐兩下
跟住覺得自己經濟會頂唔住，唯有忍氣吞聲同老味講數
所以開頭老床開出嘅條件，辣到老中幾乎要喪權辱國先可以接受
例如唔可以向老味報復關稅，要停止 2025 中國製造業大計
老床係咁意讓少少步，老中應該就（舌累） 飯應
因此老床一開頭就認為跟老中打貿易戰係  easy to win

飛毛腿

貿易戰打到難分難解
跟老味打嘅唔止係老中，幾乎大部份嘅老味貿易夥伴
本來老床應該全力應付呢鑊貿易戰
但唔係，老床無厘頭又辣起其他火頭

上個月，老床剛剛同普京晌芬蘭會面
老床話同普京傾得好好，仲話打算邀請普京今年 11月訪問老味
老味國內為此嘈到拆天，話老床落實通俄嘅指控
轉下頭，上兩個星期，老床突然對俄羅斯追加新制裁
理由係俄羅斯前特工兩父女晌陰國俾俄羅斯人化學毒劑暗算
呢鑊嘢連陰國都漸漸收聲
老味突然無厘頭攞嚟向俄羅斯發難
你老味攞第二樣理由嚟炒作都冇咁谷氣，你真係當隻北極熊係小丑咁
普京唔谷到爆就奇

飛毛腿

無啦啦又鞭一嘢隻北極熊都算嘞
一波未平，老床又攞起碌棍，兜嘢藕落隻火雞度

火雞國總統前年經過一鑊軍事政變
埃爾多安認真唔安，差 D 命都冇
佢認為係佢個政治對手搞鬼，呢條友一直匿晌老味度
埃爾多安要老味交人出嚟
老味梗係啋佢都傻

俄羅斯嘅情報能力真係堅
連埃爾多安自己都收唔到料
晌軍事政變前老埃一無所知
老埃當時去度假
俄羅斯嘅情報系統通知老埃 ： 即刻走人，唔係冇命
～ 報導冇講詳情，我覺得係俄佬好高層人物直接通知老埃，唔係老埃唔會輕易相信
老埃即刻契弟走得摩，冇鞋挽屐走
一走出酒店冇耐，酒店就被炮轟
然後一班軍人衝入酒店
老埃走遲半步都冇命

明日有時間繼續講埋落去   

飛毛腿

火雞國本來就心存大慾要做中東地區霸主
事實上火雞晌中東嘅戰鬥力僅次於以色列
而且火雞有一個身份係北約成員國，自覺有神功護體
～ 如果北約成員受到攻擊，北約有義務保護成員國而發起反擊

老味針對敘利亞發起圍毆
又扶植班恐怖份子，話係乜七溫和反對派
班反對派捉住敘利亞政府軍，生劏佢挖個心出嚟生食人心刺身
將敘利亞五歲基督徒細路女斬頭，呢 D 就係西方強國稱之為溫和反對派嘅所為
火雞國同敘利亞接鄰，邊境相連，於是乘機抽水，派兵去侵佔敘利亞邊境領土
頭幾年，敘利亞政府苦苦支撐，八成領土被恐怖份子佔領
敘利亞離亡國只有一步之遙

俄羅斯因為合併克里米亞，俾西方列強全面封殺，經濟制裁
老味得勢不饒人，要將隻北極熊打殘
普京毅然破局，將個戰場擺去中東，派戰機去敘利亞狂轟反對派
北極熊雖然今非昔比，但對付一班豺狼野狗仍然輕而易舉
火雞國勃然大怒，話俄羅斯對付嘅係佢哋嘅親人
2015年尾，火雞食咗春藥咁擊落俄羅斯一架戰機
～ 都話火雞恃住北約撐腰，俄羅斯打火雞的話要考慮北約嘅反應
人人都睇住一向以牙還牙，唔肯忍氣吞聲嘅俄羅斯有乜報復行動
但呢次出乎大部份人意料之外，普京忍住呢啖氣，冇還手報仇

有俄羅斯狂轟，又有唇亡齒寒嘅波斯國派兵相助
敘利亞班所謂反對派嘅恐怖份子就滾水淥周周咁，越玩越謝
老味睇見班炮灰越嚟越唔爭氣， 就轉而扶植班庫爾德人
庫爾德人係敘利亞丶波斯丶火雞三國嘅心腹之患
庫爾德人世代盤踞三國邊境地區，成日想獨立建國
老味嘅如意算盤係扶植一個傀儡嘅庫爾德人獨立國家
老味就可以駐守呢度監視威脅敘利亞同波斯。就好似一把尖刀咁指向佢哋心臟
至於火雞，有利用價值就用，冇用時再搵機會收拾佢
庫爾德問題係火雞嘅不可逾越嘅紅線
因此火雞對老味嘅佈局非常不滿，覺得老味出賣自己利益

冇幾耐就發生軍事政變事件
老埃指控發動政變嘅人又受到老味包庇
於是老埃就大變臉
平息政變後即刻飛去莫斯科見普京，攬頭攬頸做好兄弟
普京 ： 老埃，你家下知道啦，老味靠得住，豬乸會上樹

飛毛腿

跟住，火雞同北極熊嘅合作火速發展
俄羅斯一條油氣管道經火雞國輸向歐洲
火雞向俄羅斯購買先進嘅防空導彈 S400
老味極力反對火雞買俄羅斯防空導彈
因為火雞裝備嘅係北約武器系統
北約最大唯一嘅假想敵就係俄羅斯
要整合兩者不同嘅軍備，技術上係一個大難題
而且可能會俾俄羅斯了解到北約嘅武器技術關鍵
但火雞一意孤行，懶九理老味嘅不滿

老床發起貿易戰
鋼鋁關稅涉及火雞輸老味嘅產品
連歐盟丶大家拿呢種老味親密盟友都要捱打，何況你火雞？
火雞當然向老味報復加徵老味商品關稅
最近老味又有一個藉口向火雞窮追猛打
事緣一個老味嘅傳教士晌火雞度被捕超過兩年
火雞指控呢個傳教士係有份煽動政變
～ 火雞係回教國家，傳教士去回教國家傳基督教，有如去和尚寺賣狗肉咁無稽

老床威脅火雞要即刻放人，唔係就制裁火雞
老埃話你交出匿藏老味度果條政變主謀，我就放你個傳教士
於是老床就宣佈制裁土耳其嘅司法部長同內政部長，凍結佢哋晌老味嘅資產
～ 話就咁話，呢兩條友未必會晌老味度有資產
對等報復，火雞宣佈制裁老味嘅司法部長同內政部長，凍結佢哋晌火雞國嘅資產
老味又話，原定賣俾火雞嘅先進戰機 F35，唔賣喇
老埃冇軍火賣俾老味，就向關稅埋手
火雞將原先向老味加徵嘅關稅起一個孖 ：
老味嘅葡萄酒飲料 關稅加到140%，老味汽車 120%，煙草 60%，其他化妝品丶米丶煤炭通通關稅加倍