本帖最後由 飛毛腿 於 2017-3-29 09:21 編輯
二戰結束,日本食蕉 吞咗落肚嘅,都打到你嘔返出嚟 朝鮮半島,就俾羅斯福同史太林二一添作五瓜分 以緯度 38 度為界斬開兩橛,分為兩個勢力範圍 南方自稱大韓民國,北方沿用舊名 ~ 朝鮮
二戰結束後,好多國家地區死剩種人口唔多, 人丁單薄 戰爭結束, 唔駛擔驚受怕 大家放心閂埋門努力造人,為社會增添勞動力 人口出生率飆升,是為嬰兒潮
1952年,一個 BB女,出生於韓國一個軍人家庭 50年代初期出生於韓國嘅嬰兒唔講得上好命 頭三年係朝鮮戰爭時期 ( 港台稱為韓戰 ) 韓國同朝鮮都成為廢墟 1953年老味 跟朝鮮簽訂停火協議,戰爭暫停 ~ 只係停戰,唔係和平協議, 雙方仍然處於敵對狀態,呢個就係直至今日朝鮮半島不時劍拔駑張嘅根源
戰爭結束 本應係全力在廢墟上重新建設家園,讓國民休養生息嘅時候 尤其係韓國有老味契爺保護,契爺又開放市場俾韓國契仔 但當時嘅總統李承晚治國無能,只識高壓統治 去到 1960年,北方嘅堂兄弟加入蘇聯經濟互助委員會,埋頭苦幹 而南方呢邊,戰爭中執返條命嘅韓國人,和平後生活冇乜改善,真係一肚火 橫掂都窮到泡菜撈飯,爛命一條,於是聚眾暴動鬧事反政府 終於眾志成城將李承晚踢走,成立一個過渡臨時政府 臨時政府又係冇料到,狗噏吹水貪污就叻,治國就一事無成 韓國人於是又上街暴亂鬧事
作為監護人嘅老味唧都唔識笑 當時冷戰展開,兩個陣營鬥吹自己嘅制度點樣好 人哋北方嘅共產陣營朝鮮搞得有聲有色 南方呢邊就九粥咁亂,日日不同派別政客狗咬狗 做正經事就唔識,互相扯皮拉布就叻 咁搞法令老味契爺好冇面 於是老味用撒手鐧,策劃一個軍事政變 將班死淨把口嘅臨時政府政客剷除 扶植一個強有力嘅軍佬駕馭局面 老味睇中一個野心勃勃嘅軍佬,佢叫做朴正熙 有老味契爺背後支持,軍事政變輕易成功
政變奪權後嘅朴正熙,先係整色整水退居第二位, 其實掌握實權 然後有條不紊咁剷除所有反對勢力 最後將名義上係國家第一位嘅領導者打殘,掟入監獄 自己光明正大咁成為國家代總統,搬入總統府青瓦台居住
上面講果個女孩就係朴正熙個女, 朴槿惠 1962年, 朴槿惠 9歲,佢老豆成為韓國代總統 朴槿惠搖身一變成為韓國第一千金 呢個身份足足維持咗 18年 朴槿惠嘅青少年歲月就係在權力頂峰嘅第一家庭中渡過 |